Azərbaycanın davamlı inkişaf tempi nəhəng iqtisadi resursların bu bölgəyə cəlb olunmasını mümkün etdi

Bir vaxtlar yaddaşımızı işğal olunmuş ərazilərimizin süqutu günləri ilə yeniləməyimiz, deportasiya, soyqırım, məcburi köçkün, qaçqın kimi ifadələrə vərdiş qazanmağımız var idisə, sözün həqiqi mənasında Böyük Zəfərlə sonuclanan Vətən müharibəsindən sonra artıq yeni istilahlarla müjdələnmiş olduq. Zəfər muzeyi, Qənimətlər parkı, demarkasiya xətti kimi deyimlər daha çox gündəmdə oldu.
Mənfur düşmənin burnu ovulmuş, lakin fitnəsi tükənməmişdi. Havadarlarının sayəsində Qarabağı yenidən cəbbəxanaya çevirməyə çalışan tülkü siyasilər qoşunların təmas xəttində təxribatlar törədir, sabitliyi pozurdular. Cənab Ali Baş Komandan isə nəyi, necə və nə vaxt icra etməyi dahiyanə ustalıqla müəyyənləşdirərək, son məqamda ən güclü gedişi həyata keçirdi. Sentyabrın 19-20-də, bir sutkadan da az bir vaxt kəsiyində müzəffər ordumuzun ildırımsürətli həmlələri ilə düşmən koma vəziyyətinə düşərək,ağ bayraq qaldırdı. Xunta rejimi sonu çatdı. Qondarma rejimin cəlladları bu gün təhlükəsizlik orqanları tərəfindən tutulub, istintaqa cəlb edilirlər.
Lakin proseslərin daha önəmli tərəfi qədim-qayım ellərimizin azad nəfəs almasıdır. Artıq Vətən müharibəsi bitən kimi Azərbaycan dövləti Qarabağda geniş infrastruktur layihələrin reallaşmasına başladı.
Azərbaycanın davamlı inkişaf tempi nəhəng iqtisadi resursların bu bölgəyə cəlb olunmasını mümkün etdi. Prezident İlham Əliyevin təşəbbüsü ilə Qarabağda yeni iqtisadi rayonların yaradılması, görüləcək işlərə stimul verməklə yanaşı genişmiqyaslı tədbirlərin planlı və ardıcıl şəkildə həyata keçirilməsinin təməl daşı oldu.
Yeni mərhələdə qarşıya qoyulmuş hədəflərin reallaşdırılması məqsədilə Azərbaycan Respublikası Prezidentinin 2021-ci il 2 fevral tarixli 2469 nömrəli Sərəncamı ilə “Azərbaycan 2030: sosial-iqtisadi inkişafa dair Milli Prioritetlər” təsdiq edilmişdir. Bu prioritetlərə söykənən Azərbaycan Respublikası Prezidentinin 2022-ci il 22 iyul tarixli 3378 nömrəli Sərəncamı ilə təsdiq edilmiş “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nda əks olunmuş “İşğaldan azad olunmuş ərazilərə Böyük Qayıdış” Milli Prioritetinin icrasının təmin edilməsi məqsədilə Prezident İlham Əliyevin 16.11.2022-ci il tarixli 3587 nömrəli Sərəncamı ilə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” təsdiq edilmişdir.
Yaxın onillikdə Qarabağ ərazisi həm yerli və həm də xarici şirkətlərin geniş fəaliyyət meydanına çevriləcəkdir. Azərbaycan Prezident İlham Əliyevin bildirdiyi kimi, ilk növbədə, Qarabağın azad olunması uğrunda 30 il ərzində aparılmış mübarizədə Azərbaycanın haqq işini dəstəkləmiş bütün ölkələrin şirkətləri ərazilərin bərpa layihələrinin icrasında üstünlük hüququndan faydalanacaqlar. İşğaldan azad olunmuş ərazilərin bərpası və dayanıqlı inkişafı istiqamətində Dövlət Proqramı çərçivəsində həyata keçiriləcək tədbirlərin məqsədləri müəyyənləşdirilərkən Birləşmiş Millətlər Təşkilatının və digər beynəlxalq qurumların irəli sürdükləri qlobal inkişaf prioritetləri nəzərə alınmışdır. Türkiyə, Pakistan və İtaliya şirkətlərinin artıq bir sıra layihələr üzrə fəaliyyətə başlaması bunun əyani göstəricisidir.
Əvvəlcə bütün regionda yollar, körpülər, su elektrik stansiyaları, su və qaz təminatı kimi həyati vacib infrastruktur layihələrinin reallaşdırılması nəzərdə tutulmuşdur. Bununla da Azərbaycanın qərb bölgələri ilə Naxçıvan Muxtar Respublikasını birləşdirən avtomobil və dəmir yollarının bərpası ölkəmizin infrastruktur bütövlüyünü təmin edəcək və region ölkələri arasında birbaşa əlaqələri xeyli asanlaşdıracaq.
Dövlət Proqramının icrası çərçivəsində işğaldan azad edilmiş ərazilərdə bərpa və quruculuq işlərinin əlaqələndirilmiş şəkildə təşkili, ərazilərin ölkənin ümumi iqtisadiyyatına reinteqrasiyası, dövlət-özəl tərəfdaşlığına əsaslanan iqtisadi artımın stimullaşdırılması və dayanıqlı məskunlaşmanın təmin edilməsi kimi hədəflərin həyata keçirilməsində müstəsna əhəmiyyətə malikdir. Qeyd etmək lazımdır ki, erməni barbarlığı nəticəsində 30 ilə yaxın müddətdə Azərbaycanın işğal olunmuş torpaqları ekoloji terrora məruz qalıb, zəngin yeraltı və yerüstü sərvətləri vəhşicəsinə istismar olunub. Regionun meşə örtüyü məqsədli şəkildə məhv edilib, münbit torpaqları, su ehtiyatları ekoloji və radioaktiv çirklənməyə məruz qoyulub. Bu gün isə azad olunmuş ərazilərin minalardan təmizlənməsi, keçmiş məcburi köçkünlərin doğma yurdlarına maksimum qısa müddətdə qayıtması prioritet hədəflər sırasındadır. Artıq Füzuli-Şuşa yolunun, Füzuli hava limanının tikintisinə başlanılıb, Horadiz-Zəngilan-Ağbənd dəmir yolunun təməli qoyulub. Həmçinin Laçın rayonunda Güləbird Su Elektrik Stansiyası işə salınıb, Şuşa şəhərinin elektrik enerjisi ilə təchizatının birinci mərhələsi başa çatıb. Eyni zamanda burada Yaşıl enerji” zonasının yaradılması çərçivəsində elektrik enerjisi dəyər zəncirinin hər bir həlqəsində “yaşıl texnologiya”lardan və “yaşıl enerji” potensialından texniki və kommersiya əlverişliliyi nəzərə alınmaqla istifadə ediləcəkdir. Ekoloji təmiz nəqliyyat vasitələrindən istifadə üzrə zəruri infrastrukturun yaradılması təmin ediləcəkdir Ərazilərdə zəruri rabitə infrastrukturu qurulmaqla bu sahədə xidmətlər - mobil rabitə, radio-televiziya yayımı, xüsusi radiorabitə, internet, poçt və s. təşkil edilmişdir. Hazırda şəbəkə və xidmətlərin əhatə dairəsinin genişləndirilməsi istiqamətində intensiv işlər davam etdirilir.
Artıq bu layihələrin bir çoxu həyata keçib.Azərbaycan hökuməti bölgədə sıfırdan yeni,müasir şəhər və kəndlər inşa edir.Şübhəsiz ki,qlobal inşaat işləri müasir texnologiya və infrastruktur elementləri ilə optimallaşdırılır.
Sentyabrın 29-da ölkə rəhbərinin Zəngilanda “Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi” mövzusunda 2-ci Milli Şəhərsalma Forumunun açılış mərasimində çıxışında görülmüş işlərin icmalı sərgilənməklə yanaşı qarşıda duran ünlü vəzifələr paraflanmışdır.
Daha bir sevindirici müjdəni dövlət başçısının dilindən eşitmək necə də xoş idi: “Növbəti üç ildə 100 mindən çox sayda məcburi köçkün öz doğma yurduna, el-obasına qayıdacaqdır”.
Quruculuq işləri isə hər gün əvvəlkinə nisbətən daha yüksək sürətlə davam etməkdədir.

Zabrat qəsəbəsi, 192 saylı tam orta məktəbin
direktoru Təhmasib Məmiyev

Tarix: 3-10-2023, 14:40 Oxunub: 285