Azərbaycanın bu mötəbər beynəlxalq tədbirə dəvət olunması Prezident İlham Əliyevin rəhbərliyi ilə sürətlə inkişaf edərək mühüm beynəlxalq layihələrin müəllifinə və təşəbbüskarına çevrilən ölkəmizin dünya miqyasında artan nüfuzunun göstəricisidir

Yanvarın 16-da Birləşmiş Ərəb Əmirliklərinin paytaxtında Əbu-Dabi Dayanıqlılıq Həftəsinin rəsmi açılış mərasimi keçirilib. Azərbaycan Respublikasının Prezidenti İlham Əliyev tədbirdə iştirak edib.
Ötən günlər ərzində Birləşmiş Ərəb Əmirliyinin prezidenti ilə görüşdə olan Ali Baş Komandan bu xoş və alicənab dəvətə görə öz minnətdarlığını bildirərək çıxışına başlayıb: “Əvvəlcə, bu mühüm toplantıda iştirak etmək üçün məni dəvət etdiyinə görə Birləşmiş Ərəb Əmirliklərinin Prezidentinə təşəkkürümü bildirmək istəyirəm. Bu auditoriya qarşısında çıxış etməkdən böyük şərəf hissi duyuram. Dünən bizim cənab Prezidentlə əla görüşümüz oldu. Bu, Azərbaycan ilə Birləşmiş Ərəb Əmirlikləri arasında münasibətlərin bir çox sahədə strateji əhəmiyyətini bir daha təsdiqlədi. Bu fürsətdən istifadə edərək, bizi qəbul edən bütün tərəflərə minnətdarlığımı bildirirəm.”
Cənab Prezident çıxışında Birləşmiş Ərəb Əmirliklərinin apardığı uğurlu əməliyyatlar və əldə etdiyi nailiyyətlərlə bağlı təbriklərini ünvanlayıb və qardaş ölkə olaraq hər zaman yanında olduğunu vurğulayıb, inkişaf etdirilmiş münasibətlərlə bağlı şərəf hissi keçirdiyini bildirib: “Mən çox böyük nailiyyətlər və sürətli inkişaf münasibətilə Birləşmiş Ərəb Əmirliklərinin Prezidentini və xalqını təbrik etmək istəyirəm. Cənab Prezident, Sizin rəhbərliyinizlə Birləşmiş Ərəb Əmirlikləri dünyanın ən sabit, inkişaf etmiş və uğurlu ölkələrindən birinə çevrilib. Biz - Sizin Azərbaycandakı qardaşlarınız olaraq, gördüyünüz işlərdən çox fərəhlənirik.”
Dayanıqlılıq həftəsinin açılış mərasimində iştirakına görə sevinc və fərəh hissi keçirən Cənab Prezident Azərbaycanın həyata keçirdiyi tədbirlər, son 2 ildə əldə etdiyi əvəzolunmaz qələbə və işğaldan azad olunmuş torpaqların enerji ilə təmin olunması məsələlərinə xüsusilə toxundu. Əvvəla müasir Azərbaycan Respublikasının heç kimdən asılı olmadığını, hazırki vəziyyətinə həyata keçirdiyi müvəffəqiyyət dolu islahatlar ilə nail olduğunu, bütün tələbatlarını öz hesabına qarşıladığını bildirdi. Baş vermiş 44 günlük Vətən müharibəsinin fəsadlarının tezliklə ortadan qaldırılacağı, işğaldan azad olunmuş torpaqlara əhalinin yerləşdirilməsi və onların lazımi imkanlarla təmin edilməsi haqqında tədbirlərin sürətlə inkişaf etdirilməsi əsas məsələlərdən biri oldu.
Qaza olan tələbin artımının müşahidə olunduğunu bildirən İlham Əliyev onun Azərbaycandakı inkişafı haqqında da məlumat verdi : “Təbii qaz ixracımız artır – ötən il 19 milyard kubmetr idisə, bu il 24 milyard kubmetrə çatacaq. O, artmaqda davam edəcək. Buna görə mən bir daha söyləmək istərdim ki, Azərbaycanın bərpaolunan enerji mərkəzlərindən birinə çevrilməsi planlarımız Azərbaycanın öz enerji təhlükəsizliyi ilə bağlı deyil, belə ki, biz həmin işləri artıq söylədiyim başqa səbəblərə görə aparırıq.”
Azərbaycanın potensialını da statistic rəqəmlərlə göstərməyə üstünlük verdi: “Quruda 27 qiqavatlıq külək və günəş enerjisi, 2020-ci ildə Vətən müharibəsi zamanı azad edilmiş ərazilərdə 10 qiqavatlıq külək və günəş enerjisi, həmçinin Xəzər dənizinin Azərbaycan sektorunda 157 qiqavatlıq külək enerjisi imkanları mövcuddur. Yəni, 200 qiqavata yaxın potensial var. Əlbəttə ki, bizə kifayət qədər ixrac marşrutları lazımdır. Təbii ki, biz bütün bu layihələri mərhələli şəkildə icra edirik.”
Azərbaycandakı investisiya mühitinin çox yüksək olduğunu vurğulayan Cənab Prezident neft-qaz sektoruna qoyulan sərmayənin miqdarının yüksəkliyindən də söz açıb. Kifayət qədər inkişaf etdirilmiş neft-qaz sektorundan savayı, bərpaolunan enerji mənbələrinə diqqətin artırılacağını, bu sahədə müəyyən tədbirlərin planlaşdırıldığını bildirib və gələcəkdə bir çox uğurlara imza atacağımızın ilk göndərişlərini edib.
Azərbaycanın bu mötəbər beynəlxalq tədbirə dəvət olunması Prezident İlham Əliyevin rəhbərliyi ilə sürətlə inkişaf edərək mühüm beynəlxalq layihələrin müəllifinə və təşəbbüskarına çevrilən ölkəmizin dünya miqyasında artan nüfuzunun göstəricisidir. Zəngin neft-qaz potensialı ilə Avropanın enerji təhlükəsizliyində mühüm rol oynayan Azərbaycan Prezident İlham Əliyevin uzaqgörən siyasəti nəticəsində bu sahədə imkanlarını daha da şaxələndirir və elektrik enerjisi, əsasən, yaşıl enerjinin önəmli təchizatçısına çevrilməyi planlaşdırır. Azərbaycanın 200 qiqavata yaxın bərpaolunan enerji potensialı ölkəmizi dünyanın diqqət mərkəzinə çevirib.
Prezident İlham Əliyevin yürütdüyü enerji siyasətinin əsas istiqamətlərindən biri də işğaldan azad olunan ərazilərin potensialının qiymətləndirilməsi və istifadə olunmasıdır. Yaxın aylarda Cəbrayıl rayonunda 240 MVt gücündə “Şəfəq” Günəş Elektrik Stansiyasının istifadəyə verilməsi planlaşdırılır. Beləliklə, bərpaolunan enerji sahəsində zəngin potensiala sahib olan Azərbaycan bu istiqamətdə də reallaşdırdığı layihələrlə enerji təhlükəsizliyinin təmin olunmasında mühüm aktor kimi öz fəaliyyətini durmadan genişləndirir.

Balaxanı qəsəbəsi, 259 nömrəli məktəbin
tarix müəllimi Vəfa Babayeva

Tarix: 19-01-2023, 09:39 Oxunub: 137