İran rejiminin “halvası” BİŞİR – Çənbər daralır, BELƏ getsə...

Dünən Naxçıvana xain hücumla İran antiislam rejimi öz mahiyyətini dünyaya bir daha göstərdi. Onsuz da bilirdik.

Erməni işğalçıları ilə, məscidlərimizi yerlə bir edənlərlə, salamat qalan Allah evlərində isə donuz saxlayanlarla dostluqlarından bilirdik. Xocalı soyqırımına laqeyd münasibətlərindən, on illərlə ərazimizdəki separatçı- terrorçulara hər cür dəstək verib qayğı göstərmələrindən bilirdik. “Su axar çuxurunu tapar”...

Amma indi aqoniya vəziyyətində hara gəldi raket atır, dron göndərir. Mülki obyektləri, məktəbləri hədəf alır. Özü də barmaqla sayılacaq tərəfdaşlarının və onun halına acıyan havadarlarının sayını günü-gündən azaltmaqla...

“Beynəlxalq hüquq ABŞ-ın avantürist hərəkətləri ilə məhv edilir. Venesuelada hərbi əməliyyat, indi isə İranda”.

Bunu rusiyalı hərbi analitik İqor Korotçenko deyib.

Digər rusiyalı politoloq Marat Başiriv isə iddia edib ki, əgər İran daha bir həftə dözsə, ona beynəlxalq dəstək artacaq və bu, ABŞ üçün məğlubiyyət olacaq, eyni zamanda, bu, guya Rusiya və Çinin maraqlarına işləyəcək...

Əvvəla, 2-ci Dünya savaşından sonra beynəlxalq hüququ ilk dəfə və nümayişkaranə şəkildə məhz Rusiya ayaqaltı edib. 2008-də Gürcüstana girməklə, 2014-də Krımı işğal eləməklə. Nəhayət, 5-ci ildir Ukraynaya qarşı işğalçı müharibə aparmaqla. “Kor kora kor deməsə”, o məsələ.

İrana beynəlxalq dəstəyə gəlincə, bu da absurd gözləntidir. Nəyə görə ona beynəlxalq dəstək olmalıdır? Regional və beynəlxalq sülhə ən böyük hədənin qaynağı elə İranın özü deyil?..

Ritorik suallardır təbii ki. Gerçək belədir ki, Şimali Koreya, diktator Kim Çen İn xaric, heç bir dövlət fars rejiminə açıq dəstək ifadə etməyib, ona hərbi kömək göstərməyə hazır olduğunu bəyan etməyib.

İkincisi, fevralın 28-dən etibarən dünyanın heç bir ölkəsində İran rejiminə dəstək aksiyaları keçirilməyib, keçirilmir və keçirilməyəcək də. Özəlliklə müsəlman dünyasında. Hamı ən yaxşı halda neytral qalmağa, obrazlı ifadə etsək, öz abır-həyasını gözləməyə çalışır.

Əksinə, bəşəriyyətin cismində ləkə olan bu kriminal rejim düşmənlərin sayını artırmaqdadır. Hətta onun yaxın keçmişdəki bütün pislikləri və yaramazlıqlarına rəğmən, mötədil mövqe tutan, ərazində heç bir xarici hərbi baza olmayan Azərbaycan kimi dövlətə İran diş atdı. Eləcə də qardaş Türkiyə və bir sıra ərəb-müsəlman ölkələrini bu rejim ağılsızcasına özünə düşmənə çevirməkdədir...

Bu arada molla rejimi üçün pis xəbərlər artmağa başlayıb. Azərbaycan dünəndən İran üçün şimal-cənub nəqliyyat dəhlizini bağlayıb. Ardınca xəbər gəlib ki, Birləşmiş Ərəb Əmirlikləri (BƏƏ) Tehranın ölkə ərazisinə hücumlarına cavab olaraq BƏƏ-də yerləşən İran aktivlərini dondurmağa hazırlaşır.

Bu haqda “The Wall Street Journal” qəzeti yazıb. Nəşrin məlumatına görə, belə bir addım atılarsa, İranın xarici valyutaya və beynəlxalq ticarət şəbəkələrinə çıxışı ciddi şəkildə məhdudlaşdırılacaq. Qəzetin mənbələrinə görə, BƏƏ nümayəndələri artıq İrana bu cür tədbirlərin mümkünlüyü barədə şəxsi kanallarla məlumat çatdırıblar.

O da məlum olub ki, İranın raket və PUA-larla həyata keçirdiyi hücumların intensivliyi cəmi bir neçə gün ərzində kəskin azalıb. Müxtəlif hərbi mənbələr və beynəlxalq media tərəfindən yayılan məlumatlara görə, hücumların sayında sürətli eniş müşahidə olunur və bu dinamika regiondakı müharibənin gedişinə dair mühüm ipucları verir.

Açıqlanan statistikaya əsasən, İranın hücumlarının miqyası günbəgün aşağı düşüb. Belə ki, fevralın 28-də İran tərəfindən 300-dən çox raket və pilotsuz aparat buraxıldığı bildirilir. Martın 1-də bu rəqəm təxminən 200-ə enib. Martın 2-də hücumların sayı 110–120 arasında dəyişib. Martın 3-də 70–80, martın 4-də 50–60, martın 5-də isə təxminən 30–40 raket və dron qeydə alınıb. Beləliklə, cəmi altı gün ərzində hücumların intensivliyi təxminən 7–8 dəfə azalıb.

Çənbər daralır. Belə getsə, İran rejiminin “halvası” gözlədiyimizdən də tez hazır olacaq...

Tarix: 6-03-2026, 14:00 Oxunub: 16