Şəhidlik - Vətənpərvərliyin ən ali məqamıdır! » Xeberim.info.az İnformasiya Agentliyi

Bu ucalığa yüksələnlərin ömür yolu nə qədər qısa olsa da, şərəfli və örnək sayılır. Belə şərəfli ömür sahiblərindən biri də həmyerlimiz, Əmiraslanov Yadigar Vəliqulu oğludur.
Martın 3-də Azərbaycan Dövlət Aqrar Universitetində birlikdə təhsil aldığım tələbə yoldaşlarımla digər tələbə yoldaşımız, Birinci Qarabağ müharibəsinin iştirakçısı olan şəhid Əmiraslanov Yadigar Vəliqulu oğlunun əziz xatirəsini yad etdik.
Bu məqsədlə kollektiv olaraq ilk əvvəl şəhidin İmişli rayonunun Cəfərli kəndində təhsil aldığı məktəbi ziyarət etdik. Daha sonra şəhidin adını daşıyan bulağın önünə əklil qoyub, ruhuna dualar oxuduq.
Mərasimdə şəhidin qardaşı Qoşqar Əmiraslanov, əmisi İbaqulu Əmiraslanov və digər yaxınları və biz - şəhidin tələbə yoldaşları iştirak etdilər.
Şəhidin tələbə yoldaşları olaraq öz təəssüratlarımızı ifadə etdik. Bildirdik ki, hər şəhid millətimiz, xalqımız, dövlətimiz üçün əzizdir.
Qeyd etdik ki, bu gün hər bir azərbaycanlı Ali Baş Komandanla, ordumuzun əsgər və zabitləri, hərbçiləri, Vətən uğrunda canından keçən qəhrəman oğullarımızla, şəhidlərimizlə, qazilərimizlə fəxr edir, onlarla qürur duyur.
Şəhidin yaxınları onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını bildirdilər.
Qeyd edim ki, Əmiraslanov Yadigar Vəliqulu oğlu 20 iyul 1969-cu ildə İmişli rayonunun Cəfərli kəndində anadan olmuşdur. 1986-1992-ci illərdə Azərbaycan Dövlət Aqrar Universitetində zoomühəndislik ixtisası üzrə ali təhsil almışdır. 1993-cü ildə Qarabağ uğrunda döyüşlərə könüllü olaraq qatılmaq üçün müraciət etmiş və baş leytenant rütbəsi ilə zabit kimi döyüşlərdə fəal iştirak etmişdir. Qəhrəman şəhidimiz Füzulidən başlayaraq Murovdağ istiqamətinə doğru şanlı döyüş yolu keçmişdir. O, 1994-cü ildə Murovdağ uğrunda gedən döyüşlərdə şəhid olmuş, lakin şəhidin nəşinin çıxarılması mümkün olmamışdır.
Allah Şəhidlərimizə rəhmət eləsin.
Vətən torpaqlarının azadlığını, ərazi bütövlüyünü hər şeydən üstün tutan, bu yolda ölümün gözünə dik baxaraq Şəhidlik zirvəsinə ucalan igid oğullarımızdan biri də Səfərli Cavid Xaliq oğludur.
Həmin gün digər tələbə yoldaşımız olan Səfərov Xaliq Babalı oğlunun qəhrəman övladı, Vətən müharibəsində şəhidliyə yüksəlmiş baş leytenant Səfərli Cavid Xaliq oğlunun məzarını da ziyarət etdik.
Əvvəlcə Azərbaycanın müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsini bir dəqiqəlik sükutla yad etdik.
Şəhidimizin məzarı önünə əklil qoyub, ruhlarına dualar oxuyub, əziz xatirəsini ehtiramla yad etdik.
Mərasimdə şəhidin yaxınları və biz - şəhidin atasının tələbə yoldaşları iştirak etdilər.
Mərasimdə çıxış edərək şəhidimizə Allahdan rəhmət, ailəsinə səbir dilədik. Azərbaycan xalqının qüruru, fəxri olan bütün şəhidlərimizin, o cümlədən də Cavidin xatirəsinin daim əziz tutulacağını bildirdik. Cavid kimi qəhrəman oğullarımızla bu gün hər birimizin fəxr etdiyini, tarixi Zəfərə görə Ali Baş Komandana, şanlı Azərbaycan Ordusuna, şəhidlərimizə, qazilərimizə borclu olduğumuzu qeyd etdik.
Şəhidin atası Xaliq Səfərli və yaxınları çıxış edərək övladlarıyla fəxr etdiklərini söylədilər, onun xatirəsinə göstərilən hörmət və ehtirama görə hər kəsə təşəkkürlərini bildirdilər. Onlar Azərbaycan Respublikasının Prezidenti cənab İlham Əliyevin həssas əhali qruplarının sosial müdafiəsinin gücləndirilməsi, rifah halının yaxşılaşdırılması məqsədilə imzaladığı fərman və sərəncamlardan məmnunluqlarını ifadə etdilər, bu kateqoriyadan olan vətəndaşlara göstərilən diqqət və qayğıya görə dövlətimizin başçısına və Birinci vitse-prezident Mehriban xanım Əliyevaya minnətdarlıqlarını ifadə etdilər.
Qeyd edim ki, Səfərli Cavid Xaliq oğlu 31 may 1993-cü ildə İmişli rayonunun Əliqulular kəndində anadan olmuşdur. 2007-2010-cu illərdə C.Naxçıvanski adına hərbi liseydə, 2010-2014-cü illərdə isə Heydər Əliyev adına AAHM-də təhsil almışdır. Cavid Səfərli 2014-cü ildən Azərbaycan Silahlı Qüvvələrinin sıralarında xidmət etməyə başlamış, 2016-cı ildə baş verən Aprel döyüşlərində aktiv iştirak etmiş, önəmli strateji yüksəkliklərin alınmasında pay sahibi olmuşdur. Vətən müharibəsi başlayan kimi Cavid də çoxdandır həsrətlə gözlədiyi torpaqlarımızın azad olunması uğrunda döyüşlərə qatılmış, Cəbrayılın, Hadrut qəsəbəsinin, Füzulinin və Xocavəndin azadlığı uğrunda gedən döyüşlərdə iştirak etmişdir. Oktyabrın 21-də Xocavənd döyüşləri zamanı Düdükçü istiqamətində qəhrəmancasına şəhid olmuş və Əliqulular kəndində dəfn olunmuşdur.
Əziz şəhidimizin atası ilə son danışığını oxuyanda hər bir insanın daxili aləmində çox böyük qürur və şərəf hissi oyanır, tarixi qələbəmizin qazanılmasında şəhid olmuş qəhrəman Vətən övladlarının fədakarlığı və igidliyi insanın gözləri önündə canlanır:
- "Ata, narahat olma yaxşıyam, hər şey yaxşıdır... İndi - bu saat erməni postunu aldım, 8 erməni öldürdüm... Dovşan kimi qaçırlar hamısı...
- "Ata isə Cavidə cavabında özünü qoru, Cavid.." - deyə bildirib.
- Cavid isə həmişəki kimi gülə-gülə... "Ay ata, vallah hər şey yaxşıdır, məndən arxayın olun. İnşallah bayrağımızı Şuşaya sancacağam..." - deyə söyləyib.
Qeyd etmək istəyirəm ki, vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin müvafiq Sərəncamlarına əsasən Cavid Səfərli ölümündən sonra "Vətən uğrunda", "İgidliyə görə" və "Füzulinin azad olunmasına görə" medalları ilə təltif edilmişdir.
Allah Şəhidlərimizə rəhmət eləsin! Bütün Şəhidlərimizin ruhu qarşısında baş əyirik!