Ermənistan 44 günlük müharibədəki məğlubiyyətindən belə dərs çıxarmadı

Əfsuslar olsun ki, Azərbaycan 30 ilə yaxın müddətdə işğal problemini sülh yolu ilə həll edə bilmədi. Daha doğrusu, beynəlxalq təşkilatlar Azərbaycanın ərazi bütövlüyünü tanıdıqlarını bildirsələr də, konkret olaraq bu işğala son qoyulmasını və Ermənistan ordusunun Azərbaycan ərazisindən çıxarılmasını təmin edə bilmədilər. Həmçinin, ATƏT-in Minsk Qrupunun həmsədrlərinin dəfələrlə regiona səfərləri oldu və bunlar nəticəsiz qaldı. Demək olar ki, bu səfərlər daha çox turistik məna kəsb edirdi. Sadəcə, öz maraqlarına uyğun olaraq təşkil olunmuş səfərlərlə sanki prosesi uzadırdılar. Bu da Ermənistanın işinə yarayırdı.
Ermənistan da işğal altında saxladığı ərazilərin bütün resurslarını talan edirdi. Yalnız bəzi ərazilərdə müəyyən işlər görərək orada yaşayan erməni sakinlərin yaşamasını təmin edirdilər. Həmin erməni sakinlərinin hesabına onlar öz qondarma rejimlərini yaya bilmişdilər. Bu prosesin uzanmasında Ermənistan və separatçılar maraqlı idilər. Biz buna dözə bilmirdik. Dədə-baba torpaqlarımızı geri qaytarmaq istəyirdik. Ermənistan isə yeni-yeni ərazilər işğal etmək niyyətində idi. Bu baxımdan, Azərbaycan öz gücü hesabına işğala son qoydu və erməni silahlı birləşmələrini ərazilərimizdən çıxartdı. Demək olar ki, 44 günlük davam edən savaşdan sonra Azərbaycan regionda uzunmüddətli sülhün və əmin-amanlığın bərqərar olması üçün bütün mümkün vasitələrini səfərbər etdi. Amma Ermənistan 44 günlük müharibədəki məğlubiyyətindən belə dərs çıxarmadı.
Məhz 2023-cü ilin sentyabrın 19-da Ermənistan tərəfinin növbəti mina terroru baş verdi. Bu, Azərbaycanın səbir kasasının dolması demək idi. Azərbaycan silahlı qüvvələri tərəfindən lokal antiterror tədbirlərinə başlanıldı və nəticədə bütün qanunsuz erməni dəstələri silahı yerə qoydular. Bununla da Azərbaycan öz suverenliyini tam şəkildə bərpa etmiş oldu. Bu gün Azərbaycan beynəlxalq hüquq və konvensiyalara arxalanır. Beynəlxalq humanitar qaydalara hörmətlə yanaşırıq. O ərazini tərk edən bir nəfər erməninin belə burnu qanamadı. Antiterror tədbirləri zamanı da yalnız hərbi mövqelər, təhlükə rolu oynayan hərbçilər məhv edildi. Azərbaycan vətəndaşlığını qəbul edərək bu ərazidə yaşamaq istəyən erməni sakinlərinin müraciətləri müsbət dəyərləndirilir. Azərbaycan vətəndaşlarına şamil olunan bütün hüquqlar məhz erməni sakinlərə də aid olacaq. Bir sözlə, onların rahat yaşaması üçün Azərbaycan dövləti tərəfindən hər bir şərait yaradılıb.
Beynəlxalq ictimaiyyət Azərbaycanın beynəlxalq təşkilatların yerinə yetirməli olduğu işi etdiyinə görə bu proseslərə maneçilik törətməyəcək. Erməni lobbisinin təsiri altında Azərbaycan əleyhinə hər hansı çıxışlar etməyəcəklər.
Əfləddin Həsənov-Sabunçu bələdiyyəsinin sədri

Tarix: 13-10-2023, 13:24 Oxunub: 107