Azərbaycan müharibədə qalib gəldi

Azərbaycan Respublikası çox əlverişli iqtisadi və siyasi coğrafi mövqeyə malik olmaqla, mühüm nəqliyyat yolları üzərində yerləşmişdir. Bu baxımdan da ölkə Qafqazda öz siyasi-iqtisadi, hərbi-strateji mövqelərini möhkəmləndirmək istəyən qonşu dövlətlərin maraq dairələrinin toqquşma meydanı olmuşdur. Tarixən daxili çəkişmələrin, xarici müdaxilələrin, təcavüz və parçalanmaların mərkəzinə çevrilmiş Azərbaycana XIX əsrdən qonşu və digər ölkələrdən ruslar, ermənilər, kürdlər, almanlar və s. xalqlar miqrasiya etmişdirlər. Azərbaycan üçün siyasi-mədəni və demoqrafik cəhətdən ermənilərin miqrasiyası daha ağır nəticələr vermişdir. Belə ki, tarixi torpaqlarımızın xeyli hissəsinin (İrəvan quberniyası) itirilməsi və kütləvi erməni axınının (Qarabağa ermənilərin köçürülməsi) bölgələrimizdə yerləşdirilməsi, sonralar onların işğalçılıq siyasətlərini həyata keçirmələri ərazimizin 20%-nin zəpt olunması ilə nəticələnmişdir. 90-cı illərin əvvəllərindən etibarən başlayan erməni təcavüzü, azərbaycanlılara qarşı törətdikləri qətllər, etdikləri vəhşiliklər xalqımızın yaddaşına silinməz iz salmış, ağır yaralar vurmuşdur. Qarabağda baş verən hadisələr, işğal edilmiş ərazilərdə ermənilər tərəfindən əsir və girovların başına gətirilən müsibətlər, Xocalı soyqırımı hələ uzun illər də ağır hüzünlə xatırlanacaqdır. 2019-cu il avqustun 5-də Xankəndidə Ermənistanın baş naziri Nikol Paşinyan “Qarabağ Ermənistanın bir hissəsidir və nöqtə” açıqlaması ilə Ermənistanın işğalçılıq siyasətinin bir daha açıqladı. Azərbaycan Respublikasının Prezidenti İlham Əliyev 2019-cu il oktyabrın 3-də “Valday” Beynəlxalq Diskussiya Klubunun XVI illik iclasında çıxışı zamanı N.Paşinyanın bu bəyanatına “Qarabağ Azərbaycandır və nida işarəsi” deməklə sərt reaksiya verdi. 2020-ci il sentyabrın 27-də Ermənistanın növbəti irimiqyaslı hərbi əməliyyatlara başlamasına, Azərbaycan Ordusunun mövqelərinə və mülki yaşayış məntəqələrinə atəş zərbələri endirməsinə cavab olaraq əks-hücum əməliyyatı işə düşdü, sonradan “Dəmir Yumruq” adını alan bu əməliyyat Vətən müharibəsinə çevrildi. 44 gün davam edən bu əməliyyat nəticəsində 30 ilə yaxın işğal altında qalan torpaqlarımız geri qaytarıldı və uzun illər öz doğma sakinlərini gözləyən Vətən torpağı yenidən canlanmağa başladı. İşğaldan azad edilmiş ərazilərdə müasir standartlarla bərpa və yenidənqurma işlərinə başlanıldı. Regionda yeni geosiyasi konfiqurasiyanın davamlı olması, sülh əldə edilməsi və təhlükəsizlik mühitinin yaradılması istiqamətində Azərbaycan mühüm addımlar atmağa başladı və bu istiqamətdə təşəbbüsü davam edirir.
Azərbaycan Respublikasının Prezidenti İlham Əliyev "Qlobal dünya nizamına təhdidlər" mövzusunda IX Qlobal Bakı Forumunda çıxışı zamanı söyləmişdir ki, Ermənistan ərazi iddialarından əl çəkməlidir. Azərbaycan müharibədə qalib gəldi. O, həmçinin qeyd etmişdir ki, indi sülh haqqında danışmaq lazımdır, əməkdaşlıq yaratmaq vaxtıdır. Qarabağda yaşayan erməni əhalisinin hüquqları və təhlükəsizliyi Azərbaycanın Konstitusiya ilə nəzərə alınacaq və təmin ediləcək. Azərbaycan çoxmillətli ölkədir və bütün millətlərin nümayəndələri burada bərabər hüquqa malikdir.
Azərbaycan Respublikasının Prezidenti İlham Əliyev cari ilin 20 noyabr tarixində İraq Respublikasının Prezidenti Əbdüllətif Camal Rəşidin Azərbaycana səfəri ilə əlaqədar mətbuata verdiyi bəyanatında da bu barədə danışmışdır. “Biz sülhə hazırıq, lakin ədalətli sülhə, hər iki ölkənin ərazi bütövlüyünün və suverenliyinin tanınması əsasında olan sülhə. Biz sağlam düşüncəyə və tarixi ədalətə əsaslanan sülhə hazırıq.”

Maştağa qəsəbəsi, 293№li tam orta məktəbin
Coğrafiya müəllimi Aidə Abbasova

Tarix: 23-11-2023, 08:58 Oxunub: 118