Pənah Babayev: Xocalıda Ucalan Bayraq - Tarixin Ədalət Anı və Milli Qürurun Zəfəri

Mehdiabad qəsəbə 1 nömrəli tam orta məktəbinin direktoru,
Pənah Babayev

2024-cü il 26 fevral tarixində Azərbaycan xalqı tarixində ilk dəfə olaraq Xocalı şəhərində – artıq işğaldan azad olunmuş doğma torpaqda – Xocalı soyqırımı qurbanlarının xatirəsini andı. Bu, təkcə anım mərasimi deyil, həm də tarixi ədalətin bərpasının rəmzi idi. İllərlə həsrətlə gözlənilən bu gün xalqımız üçün həm hüzn, həm də qürur günü oldu. Şəhidlərin ruhu məhz öz doğma yurdlarında yad edildi və bu an Azərbaycan dövlətinin iradəsinin, xalqın birliyinin və milli yaddaşın gücünün parlaq təzahürünə çevrildi.

Həmin gün ölkə Prezidenti cənab İlham Əliyev Xocalı şəhərində Xocalı Soyqırımı Memorialının təməlini qoydu. Dövlət başçısı rayon ictimaiyyəti ilə görüşündə xüsusi vurğuladı ki, bu memorial kompleksinin layihəsi əslində illər öncə hazır idi. Hətta onun Bakıda, Xocalı soyqırımı abidəsinin yanında inşa edilməsi üçün yer də seçilmişdi. Lakin Prezidentin uzaqgörən siyasi baxışı bu layihənin icrasını məqsədli şəkildə təxirə salmışdı. Çünki dövlətimizin başçısı inanırdı və bilirdi ki, Azərbaycan xalqı gec-tez öz torpaqlarına qayıdacaq və memorial məhz faciənin baş verdiyi məkanda ucaldılmalıdır.

2003–2020-ci illər ərzində ölkənin bütün iqtisadi, siyasi və hərbi potensialının gücləndirilməsi məhz bu böyük məqsədə – ərazi bütövlüyünün bərpasına xidmət edirdi. Azərbaycan ordusunun müasirləşdirilməsi, beynəlxalq müstəvidə aparılan məqsədyönlü diplomatik fəaliyyət, iqtisadi dayanıqlığın təmin edilməsi və milli birliyin möhkəmləndirilməsi gələcək qələbənin təməl sütunları idi. Bu illər ərzində dövlət başçısı bütün fəaliyyətini sistemli və strateji şəkildə bu hədəfə yönəltmişdi.

2020-ci ilin sentyabr-noyabr aylarında baş vermiş Vətən müharibəsi 17 illik hazırlığın möhtəşəm nəticəsi oldu. Azərbaycan Ordusu cəmi 44 gün ərzində düşmənə sarsıdıcı zərbələr endirdi və işğal altında olan torpaqlarımızın böyük hissəsini azad etdi. Bu müharibə həm hərbi gücümüzü, həm də xalq-iqtidar birliyini bütün dünyaya nümayiş etdirdi. Qələbə təkcə hərbi deyil, həm də mənəvi və siyasi zəfər idi.

Azərbaycanın illər boyu dünyaya ünvanladığı “Xocalıya ədalət!” çağırışı uzun müddət beynəlxalq ictimaiyyət tərəfindən lazımi səviyyədə cavablandırılmadı. Baxmayaraq ki, 18 ölkə bu faciəni soyqırımı kimi tanıdı, böyük dövlətlərin və bir çox nüfuzlu beynəlxalq təşkilatların susqunluğu diqqətdən yayınmadı. Halbuki, Xocalıda baş verənlər insanlıq əleyhinə törədilmiş ağır cinayət idi və beynəlxalq hüquq normalarına əsasən obyektiv qiymət almalı idi.

Bu istiqamətdə Heydər Əliyev Fondunun fəaliyyəti xüsusi əhəmiyyət daşıyır. Fondun təşəbbüsü ilə həyata keçirilən “Xocalıya ədalət!” beynəlxalq kampaniyası çərçivəsində dünyanın müxtəlif ölkələrində konfranslar, sərgilər, təqdimatlar təşkil olundu, kitablar və məqalələr dərc edildi. Bu fəaliyyət nəticəsində Xocalı həqiqətləri daha geniş auditoriyalara çatdırıldı və informasiya mübarizəsində mühüm uğurlar əldə edildi.

Lakin bütün bu səylərə baxmayaraq, erməni lobbisinin və onların xaricdəki himayədarlarının apardığı təbliğat fəaliyyəti cinayətkarların məsuliyyətdən yayınmasına xidmət edirdi. Bu reallıq Azərbaycan dövlətini bir daha göstərdi ki, tarixi ədaləti təmin etmək üçün yalnız öz gücünə arxalanmaq lazımdır. Nəticədə Azərbaycan həm diplomatik müstəvidə, həm də hərbi sahədə qətiyyətli addımlar ataraq suverenliyini bərpa etdi.

İkinci Qarabağ müharibəsindən sonra 30 ilə yaxın işğal altında qalmış torpaqlarımızın böyük hissəsi azad edildi. Qalan ərazilər isə 2023-cü ilin sentyabrında həyata keçirilən lokal antiterror tədbirləri nəticəsində tam nəzarətə götürüldü. Bununla da ölkəmizin ərazi bütövlüyü və suverenliyi tam şəkildə təmin edildi. Bu hadisələr Azərbaycanın yeni inkişaf mərhələsinin əsasını qoydu.

Dövlət başçısı öz çıxışlarında dəfələrlə vurğulayıb ki, Xocalısız, Xankəndisiz Azərbaycanın qələbəsi tam hesab oluna bilməzdi. Çünki Xocalı faciəsi xalqımızın yaddaşında sağalmaz yaradır. Bu şəhərin azad olunması həm də milli ləyaqətin və tarixi ədalətin bərpası demək idi. Xocalıya qayıdış, əslində, xalqımızın mənəvi zəfərinin rəmzinə çevrildi.

Nəhayət, 2023-cü il oktyabrın 15-də Prezident, Müzəffər Ali Baş Komandan İlham Əliyev Xocalıda Azərbaycan Bayrağını ucaltdı. Bu tarixi an erməni separatizminin və işğal siyasətinin iflasının rəsmi təsdiqi oldu. Xocalıda dalğalanan üçrəngli bayraq bütün dünyaya bir mesaj idi: Azərbaycan öz torpaqlarında əbədi və dönməz şəkildə sahibdir, ədalət gec də olsa, bərpa olundu və milli qürur yenidən ayağa qalxdı.

Tarix: 24-02-2026, 10:38 Oxunub: 29