Tarixi Azərbaycan sərhədləri bərpa olunacaq

2022-ci il dekabr ayının 24-də Azərbaycan Respublikasının Prezidenti İlham Əliyev Qərbi Azərbaycan İcmasının inzibati binasında yaradılan şəraitlə tanış olmuş və Qərbi Azərbaycandan olan bir qrup ziyalı ilə görüşmüşdür. Dövlət başçısına binada yaradılan şərait barədə məlumat verilmişdir. Ümumi sahəsi 1280 m2 olan binada 23 iş otağı, iclas və konfrans zalları, müxtəlif yardımçı otaqlar mövcuddur.
Qeyd edək ki, Qərbi Azərbaycan İcmasının məqsədi müxtəlif vaxtlarda etnik mənsubiyyətinə görə Ermənistandan didərgin salınmış azərbaycanlılar və onların varislərinin ictimai-mədəni birliyini yaratmaqla hüquqlarının beynəlxalq müstəvidə bərpası, Ermənistan ərazisindəki Azərbaycan xalqının zəngin tarixi-mədəni irsinin öyrənilməsi və təbliğidir. İcmada Müşahidə Şurası, İdarə Heyəti, Nəzarət-Təftiş Komissiyası, Ağsaqqallar Şurası, Ziyalılar Şurası, Qadınlar Şurası, Gənclər Birliyi, Qəyyumlar Şurası və xarici ölkələrdə nümayəndəliklər fəaliyyət göstərir. Təşkilatda Qərbi Azərbaycanda azərbaycanlılar yaşamış 22 rayondan nümayəndələr təmsil olunurlar. Təşkilat 1989-cu ildən Qərbi Azərbaycan qaçqınlarının problemləri ilə məşğul olan və 1988-1991-ci illərdə qaçqın düşən azərbaycanlılar barədə faktların və sənədlərin toplandığı və saxlandığı ictimai qurumdur. 1988-1991-ci illərdə Qərbi Azərbaycandan qovulmuş 50 mindən çox ailənin 20 minə qədərinə dəymiş ziyan hesablanmış və hazırda da bu istiqamətdə işlər davam etdirilir.
Cənab İlham Əliyev icma üzvləri ilə görüş zamanı qədim Azərbaycan torpaqları olan İrəvanın və Zəngəzurun Ermənistana verilməsinin tarixi səhv olduğunu vurğulamışdır. Bu addım Azərbaycanı coğrafi nöqteyi-nəzərdən Türkiyədən ayırmışdır. Xalqın faciəsi bununla yekunlaşmamışdır. 1948-1953-cü, 1988-1991-ci illərdə azərbaycanlılar öz yurd-yuvalarından deportasiya olunmuşlar. Bu deportasiyalar zamanı yüzlərlə azərbaycanlı zərər çəkmiş, müxtəlif işgəncələrə məruz qalmışlar. Qarabağdakı erməni vəhşilikləri Qərbi Azərbaycanda da törədilmişdir. Abidələr, məzarlıqlar məhv edilmişdir.
44 günlük Vətən müharibəsi nəticəsində xalqın Qarabağ həsrəti sona çatdı. Şuşaya, xarıbülbülə qovuşduq. İçimizdəki alova bir az su sərpildi. Qərbi Azərbaycandan olan soydaşlarımız qəlblərini Qarabağ sevinci ilə ovutdular. İndi isə sıra tarixi torpaqlarımızdadır. Vətən müharibəsi bütün dünyaya, həmçinin bizim özümüzə də sübut etdi ki, Azərbaycan xalqı çox şeyə qadirdir. İnam, birlik olduğu müddətcə hər cür çətinliyin öhdəsindən gələ bilərik. Müharibədən əvvəl xəyal belə edə bilmirdik ki, bir gün İrəvana, Zəngəzura gedə bilərik. Amma indi vəziyyət fərqlidir. İndi ümidimiz var. Ordumuza, rəhbərimizə böyük inamımız var.
Əvvəlki illərdə Prezident adətən, doğum günlərində qaçqınlarla görüşüb onların problemləri ilə yaxından maraqlanırdı. Hər zaman qaçqınlara söz verirdi ki, onlar doğma torpaqlarına qayıdacaqlar. Cənab İlham Əliyevin bu il 24 dekabr tarixində Qərbi Azərbaycan İcması ilə görüş təşkil etməsi də bunu deməyə imkan verir ki, azərbaycanlılar öz dədə-baba yurdlarına, Qərbi Azərbaycana qovuşacaqlar. Gün gələcək, qərbi azərbaycanlıların gözündəki o nisgil, vətən həsrəti silinəcək.
Bu xalqın igid oğulları hər qonşuda bir parçası əsir qalan Azərbaycan torpaqlarını bir-bir geri qaytaracaqlar. Tarixi Azərbaycan sərhədləri bərpa olunacaq. Şanlı bayrağımız vətənin hər yerində özgürcə dalğalanacaq!

Balaxanı qəsəbəsi, 69 nömrəli tam orta məktəbin
Azərbaycan dili və ədəbiyyat müəllimi Nuranə Qarayeva

Tarix: 28-12-2022, 13:44 Oxunub: 488