Azərbaycan iqtisadiyyatının çiçəklənməsində Heydər Əliyevin rolu

1969-cu ildə Azərbaycan Sovet İttifaqının iqtisadi cəhətdən zəif respublikası idi. Neft emalı sənayesinin və kənd təsərrüfatının potensialının olmasına baxmayaraq, əhali yoxsulluq içində yaşayırdı. Mərkəzi hakimiyyət Azərbaycana biganə yanaşır, onun problemlərinin həllinə maraq göstərmirdi. Çətin vəziyyətə baxmayaraq, respublika rəhbərləri sosial və iqtisadi problemlərin həlli üçün Kremlə müraciət etmmirdilər. Lakin respublikaya Heydər Əliyev rəhbərlik etdikdən sonra dirçəliş dövrü başladı. 70-ci illərdə geniş fəaliyyət göstərən Heydər Əliyev Azərbaycanda 300-dən çox sənaye müəssisəsinin tikilib istifadəyə verilməsinə nail olmuşdur. 1969-1985-ci illər ərzində respublikada sənaye istehsalı iki dəfə artmışdır. Azərbaycan 1970-1985-ci illərdə neft məhsulları, neft avadanlığı, polad borular, əlvan metallar, sintetik kauçuk, elektrik mühərrikləri, məişət kondisionerləri, mineral gübrələr, çini məmulatları, xalça istehsalı üzrə artıq İttifaqda aparıcı yerləri tutmuşdur. xalça məmulatları və s. Azərbaycanda istehsal olunan 350 adda məhsul dünyanın 65 ölkəsinə ixrac edilib. Beləliklə, geridə qalmış aqrar ölkədən sənaye respublikasına çevrilmiş Azərbaycanın nüfuzu ittifaq səviyyəsində artdı.
1991-ci ilin sonunda Sovet İttifaqında baş verən suverenləşmə dalğası nəticəsində Azərbaycan müstəqil dövlət oldu. Ölkə siyasi və iqtisadi idarəetmə mexanizmlərinin faktiki olaraq yenidən yaradılması zərurəti ilə üzləşdi, çünki əvvəllər mövcud olanlar məhv edilmişdi və yeni tarixi şəraitdə istifadə üçün yararsız idi. Bundan əlavə, Azərbaycanın müstəqillik əldə etdiyi dövrdə Ermənistanla Dağlıq Qarabağa görə hərbi qarşıdurma nəticəsində daxili siyasi vəziyyət son dərəcə mürəkkəb idi. 1992-ci ildə Ulu öndər Heydər Əliyevi rəhbərliyi ilə təsis edilən Yeni Azərbaycan Partiyasının əsas qayəsi daxili sabitliyi təmin etmək, hüquqi dövlət, sabit və sosialyönümlü iqtisadiyyat, vətəndaş cəmiyyəti qurmaq və beynəlxalq arenada mühüm nailiyyətlərə imza atmaq idi. 1993-cü ildə Ulu öndər Heydər Əliyevin ikinci dəfə hakimiyyətə gəlməsi, onun düşünülmüş və ardıcıl siyasət yeritməsi vəziyyətin yaxşılaşmasına səbəb oldu.
Heydər Əliyevin respublikaya rəhbərliyinin ikinci dövründə ölkədə genişmiqyaslı iqtisadi islahatlara başlanılmışdır. Heydər Əliyev bazar iqtisadiyyatı əsasında ümumi daxili məhsulun artırılması istiqamətində islahatların həyata keçirilməsini, eləcə də qeyri-neft sektorunun sürətli inkişafını təmin etməyi qarşıya qoymuşdu. Məhz Ulu öndər Heydər Əliyevin fəal iştirakı ilə “Əsrin müqaviləsi” imzalandı, Azərbaycanın Neft Strategiyası hazırlandı və Azərbaycanın hərtərəfli modernləşdirilməsinə yönəlmiş bir sıra layihələr həyata keçirildi. Ümumilli liderin yürütdüyü siyasət nəticəsində Azərbaycan Respublikasının xarici dövlətlərlə, beynəlxalq maliyyə-iqtisadi strukturlarla əməkdaşlığı da yüksək səviyyədədir. Heydər Əliyevin səyləri nəticəsində iqtisadi tərəqqi dövrü başlandı, iqtisadi inkişaf sahəsində mühüm addımlar atıldı.
Ümumilli lider H.Əliyev və onun layiqli davamçısı İlham Əliyev tərəfindən Azərbaycan iqtisadiyyatında aparılan uğurlu islahatlar nəticəsində bu gün ölkə Cənubi Qafqazın iqtisadi cəhətdən ən inkişaf etmiş dövlətidir. Ölkədə sosial-iqtisadi və siyasi vəziyyətin düzəldilməsi istiqamətində mühüm və çox uğurlu işlər görülmüş, bunun nəticəsində iqtisadi inkişafa nail olunmuşdur.

Tarix: 6-04-2022, 09:59 Oxunub: 35