Dövlət rəsmilərinin Xocalıya səfəri nəyə işarədir? - “Yaxın vaxtda...”

Xəbər verdiyimiz kimi, Azərbaycan Respublikasının İqtisadiyyat Nazirliyi ilə Ekologiya və Təbii Sərvətlər Nazirliyi Qarabağdakı təbii ehtiyatların qanunsuz istismarını araşdırmaq üçün monitorinq qrupu yaradıb. Qrupa “AzerGold” QSC-nin mütəxəssisləri də daxildir.

Monitorinq qrupu 30 ildən sonra ilk dəfə Qarabağın dağlıq hissəsinə keçərək, hazırda Azərbaycan Respublikasının ərazilərində müvəqqəti yerləşdirilmiş Rusiya sülhməramlı kontingentinin komandanlığı ilə görüşüb. Dekabrın 3-də keçirilmiş müzakirələr dekabrın 7-də Rusiya sülhməramlılarının Xocalıdakı qərargahında bu kontingentin komandanlığı ilə davam etdirilib.

Görüşdə faydalı qazıntı yataqlarına, xüsusilə “Qızılbulaq” qızıl və “Dəmirli” mis-molibden yataqlarına yerində baxış, qanunsuz istismarın dayandırılması, müxtəlif istiqamətlər üzrə monitorinq və inventarizasiyanın aparılması, əmlakın kadastr uçotunun təşkili, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi və dəymiş zərərin nəticələrinin aradan qaldırılması məsələləri müzakirə olunub.

Rəsmi məlumatda görüşün konstruktiv ruhda keçdiyi, aidiyyəti üzrə təmasların davam etdiriləcəyi bildirilib.

Azərbaycanın dövlət rəsmilərinin Xocalıya səfərləri barədə Modern.az-a danışan Milli Məclisin deputatı Elman Məmmədov bunun müsbət hadisə olduğunu deyib. Xocalının deputatı hesab edir ki, belə səfərlər Azərbaycanın Rusiya sülhməramlı kontingentinin müvəqqəti nəzarətində olan ərazilərdə nəzarətini bərpa etməyə başladığını göstərir:

“Bundan sonra gediş-gəlişlərin, araşdırmaların sayı daha çox olacaq. Müəyyən qədər vaxta ehtiyac var. Bir müddətdən sonra ərazilərimiz tamamilə nəzarətimizə keçəcək. Bu, erməniləri çox narahat edir. Ermənilər anlayırlar ki, həm Azərbaycanın hərbi, həm iqtisadi, həm də beynəlxalq hüquqa əsaslanan haqlı, ədalətli tələbləri, hərəkətləri qarşısında çox acizdirlər. Bu, Azərbaycanın növbəti uğuru kimi qiymətləndirilməlidir”.

Bununla belə deputat vurğulayıb ki, səfərlər zamanı Rusiya sülhməramlılarının özbaşınalıqlarına da rast gəlinir:

"Ötən gün azərbaycanlı jurnalistlərin Xocalıya girişinə icazə verilmədi. Necə ola bilər ki, həmin yoldan qeyri-qanuni silahlı birləşmələr, İran və Fransa kimi ölkələrin terror dəstələri gəlib-gedə bilir? Azərbaycana düşmən mövqe tutan dövlətlərin siyasətçiləri gəlirlərsə, biz niyə getməyək? Bu, sülhməramlıların kobud şəkildə qanunlarımızı pozması, ərazi bütövlüyünə hörmətsizliyidir. Qısa vaxtda bunun da qarşısı alınacaq və ərazilərimiz nəzarətə götürüləcək".

Tarix: 9-12-2022, 09:17 Oxunub: 39