"Ermənistan Rusiyadan və Fransadan daha çox İrana ümidlə baxır" - İNCƏLƏMƏ...

Ermənilərin "Joqovurd" qəzeti yazır ki, "Avropa tərəfi Azərbaycanın dünənki təxribatını şərh etməyə tələsmir. “Joqovurd” qəzeti Avropa Parlamentində erməni məsələləri üzrə daimi məruzəçi Andrey Kovaçevdən şərh istəyib. O, isə bildirib ki, baş verənlərlə bağlı məlumat yoxdur. “Mən indicə Josep Borrell-in ofisində Avropa Xarici Fəaliyyət Xidmətinə müraciət etdim və fevral ayından orada yerləşən diplomatik missiyamızın harada olduğunu soruşdum. Ancaq unutmayın ki, göndərilən mülki missiyadır, onlar silahsızdırlar və atəş aça bilməzlər”.
Erməni məsələləri üzrə daimi məruzəçinin diplomatik missiyanın harda olduğunu bilməməsi gülüncdür. Bu da bir daha sübut edir ki, qeyd edilən Avropa İttifaqı erməni “dəyərlərinə” layiqincə dəyər verir.

“Ağ Partiya”-nın sədr müavini, politoloq Əhəd Məmmədli Bizimyol.info xəbər portalına açıqlamasında bildirib ki, vəziyyət avropalıların məsələlərə yanaşmasının sübutudur.

“Bu şəxs hələ Avropa Parlamentində erməni məsələləri üzrə daimi məruzəçidir və o deyir ki, “mən bilmirəm komissarlar harda yerləşir, Boreldən soruşdum”. Əslində bu ermənilər üçün tragikomik bir vəziyyətdir. Ermənilər indi hamıya ümidlə baxır, hamıdan istifadə etməyə çalışırlar. İstər Avropaya, istər İran, istər Rusiyadan, hər kəsdən, Pelosidən, Makrondan istifadə edərək, Azərbaycanın üstünə gəlməyə çalışırlar. Amma reallıq budur ki, heç kim birbaşa Azərbaycan və onun ən yaxın müttəfiqi Türkiyə ilə üz-üzə gəlmək istəmir. Bu hadisə də onun göstəricisidir”-deyə politoloq bildirib.

Ötən gün baş verən təxribata gəldikdə isə, Əhəd Məmmədli qeyd edib ki, vəziyyət erməni tərəfindən qaynaqlanıb. Rəsmi məlumatlarda da qeyd edildiyi kimi, ermənilər bizim posta hücum ediblər.

“Son zamanlar bizim irəlilədiyimiz yerlərdən bizi geri atmaq istəyiblər. Və layiqli cavablarını alıblar”-deyən Əhəd Məmmədli hesab edir ki, Ermənistan bu cəsarəti İrandan alır. Çünki hadisələrdən bir qədər əvvəl İranın Təhlükəsizlik Şurasının rəhbəri erməni həmkarını dəvət edərək, görüş keçirib və bu görüşdən sonra hadisə baş verib.

Politoloq hesab edir ki, bu gün Ermənistan üçün ən yaxın tərəfdaş İrandır.

“Erməni mediasına, erməni siyasi çevrəsinə nəzər yetirsək, İran haqqında ağız dolusu danışırlar. Rusiyadan da, Fransadan da daha çox İrana ümidlə baxırlar. Çünki real olaraq, onlara hərbi dəstək verir. Bu işin arxasında biz İranı axtarmalıyıq. Bu, mənim şəxsi fikrimdir”,- deyə Əhəd Məmmədli qeyd edib.

Ermənilərin Avropa diplomatik missiyasından ümidli olmasına gəldikdə isə, Avropa Parlamentində erməni məsələləri üzrə daimi məruzəçisinin sözləri bir daha sübut edir ki, Avropa İttifaqı bu məsələyə önəmli məsələ kimi yanaşmır. Avropa İttifaqı missiyasının fəaliyyəti protokol qaydası fəaliyyətdir. Çünki özlərinin də vurğuladığı kimi Avropa missiyası silahlı qurum deyil, sadəcə müşahidə edə bilərlər.

P.S. Bu yerdə ermənilərin Azərbaycan atalar sözünü xatırlamalarını tövsiyyə edərdim. Atalar sözündə deyilir ki, “sənə güvəndiyim dağlar, sənə də qar yağarmış”. Bu gün Ermənistan mediasının yazdığı bu vəziyyət sübut edir ki, onların güvəndiyi dağlara çoxdan qar yağıb, sadəcə hələ xəbərləri yoxdur.

Tarix: 13-04-2023, 15:30 Oxunub: 40