Cənubi Qafqazda yeni müharibə zəngləri - “İran müdaxilə etsə...”

Politoloq Cümşüd Nuriyev Teleqraf.com-un suallarını cavablandırıb.

Müsahibəni təqdim edirik:

- Fransa Ermənistanı silahlandırır, Niderland Avropa Birliyini İrəvana hərbi dəstək verməyə çağırır, bəzi qitə ölkələri əleyhimizə qətnamələr qəbul edirlər, liderlərin Brüssel görüşü ləğv olunur və sair. Sizcə, Avropadakı Azərbaycana qarşı bu fəallıq nədən xəbər verir, nəyə hazırlaşırlar?

- Avropanın nəyə hazırlaşdığını deyə bilmərəm, amma Fransa Afrikada bütün mövqelərini itirdiyinə görə Cənubi Qafqaza girməyə çalışır. Bu, Amerikanın tapşırığı ilə olan bir şeydir. Çünki çalışırlar ki, Qafqazdakı mövqelərini itirməsinlər. Bilirlər ki, burada onların oyunlarına gedə biləcək yeganə dövlət Ermənistandır.

Burada həm Ermənistanla, həm də pərdə arxasında İranla oyun oynayırlar. Görünən budur ki, Fransa Afrikada itirdiyi mövqelərini Qafqazla kompensasiya etməyə çalışır.

Ermənistana silahların satılması boş şeydir. Çünki Ermənistanın elə bir siyasi, iqtisadi və hərbi gücü yoxdur ki, Azərbaycan ərazisinə girsin.

- Bəs Fransanın Ermənistanda Rusiyanı əvəzləməsi üçün münbit zəmin varmı?

- Buna inanmıram. Dediyim kimi, bu, Amerikanın tapşırığıdır. Ermənistan Rusiyanı dəyişsə, bitəcək. Ermənistandakı bəzi qüvvələr bunu başa düşürlər. Bizə ehtiyac yoxdur, Rusiya bunu onlara bağışlamayacaq.

İran bir az tərəddüd içindədir, Fransaya həm “hə”, həm də “yox” deyir. Çünki onların bir-birlərinə bağlılığı çoxdur. Rusiyaya gəlincə, Fransanın onu bölgədən çıxarmağa gücünün çatacağına inanmıram. Rusiyanın həm İkinci Qarabağ Müharibəsi, həm də birgünlük antiterror tədbirləri zamanı Rusiyanın bitərəf mövqe tutmasının səbəbi o idi ki, Azərbaycan öz gücünü göstərsin. Azərbaycan da öz gücünü sübut etdi.

Fransa vurnuxur, Makron gah bura əl atır, gah Fələstində Mahmud Abbasla görüşür, gah da İsrailə gedir, görünən budur ki, itirdikləri rollarını geri qaytarmağa çalışırlar. Makron özünü Şarl De Qollun yerində görür, amma ondan De Qoll olmaz. Çünki Şarl De Qollun fikri bu idi ki, Fransa haradadırsa, orada güclü olmalıdır. Makronun can atdığı yerlərdə isə Fransa yoxdur.

- Liderlərin Brüssel görüşü niyə ləğv edildi, bunun arxasında da Fransa var?

- Belə olduğunu düşünmürəm. Fransa çalışdı ki, Azərbaycanı öz təsir dairəsinə sala bilsin, amma bu cəhdi alınmadı. Çünki Fransanın belə bir işi görəcək qədər ağlı yoxdur.

- Hesab etmək olarmı ki, sülh gündəmdən çıxır, belə bir durumda yeni müharibə riski nə qədərdir?

- İsrail Qəzzada quru əməliyyatlarına başlasa, İran mütləq buna qarışacaq. Amerika da hərəkətə keçmək üçün hazır vəziyyətdədir. Baydenin də durumu yaxşı deyil, nüfuzdan düşüb. Üstəgəl, qarşıdan seçkilər gəlir. Elə bir vəziyyət yaranıb ki, Amerika İranı vurmağa çalışır. Yəni bölgədə müharibənin olması ehtimalı çox yüksəkdir.

- Cənubi Qafqazda özünə yer etmək istəyən Qərbə və ya Fransaya Türkiyənin cavabı necə ola bilər?

- Günlərdir Azərbaycanda Türkiyə Silahlı Qüvvələri ilə birgə keçirilən irimiqyaslı təlimlər bir mesaj idi. Bu mesaj da həm Qərbə, elə Fransanın özünə ünvanlandı.

Makron hakimiyyətə gələndə Fransada həm islamofobiya, həm də türkofobiya çox güclənib. Türkiyə də Fransaya öz mesajını Azərbaycandan verdi.

Tarix: 26-10-2023, 16:00 Oxunub: 82