Bakının İsraildən o xahişi... - anti-Azərbaycan təbliğatı belə faş olur

Ermənilər iş başındadır; İsrail-İran savaşı ilə bağlı Azərbaycanı hədəfə çıxarmaq istəyən hansı qüvvələrdir?
İsraillə İran arasında başlanmış müharibədə aviasiya və uzaqmənzilli artilleriyanın istifadə olunması nəticəsində mülki obyektlərə və mülki şəxslərə zərər dəyə bilər. İndilikdə Təl-Əviv və Hayfada mülki obyektlər vurulsa da, Tehran və Təbrizdə hərbi obyektlər vurulur. Ancaq sabah vəziyyət dəyişə bilər.

Oxu.Az-ın məlumatına görə, Azərbaycan bu səbəbdən müxtəlif kanallarla İsrail rəhbərliyinə İranda azərbaycanlıların yaşadığı yaşayış məntəqələrini hədəf götürməmək, mülki infrastruktura və dinc əhaliyə zərər yetirməməklə bağlı mesaj göndərib.

Bu mesajın həm Güney Azərbaycan, həm də Azərbaycan-İsrail münasibətləri üçün önəmi nədir?

Qeyd edək ki, son günlər SEPAH-a yaxın mənbələr Azərbaycan dövlətinin guya Cənubi Azərbaycanda dinc əhalinin taleyinə laqeyd qalması, hətta İsrailə kəşfiyyat dəstəyi verməsi ilə bağlı dezinformasiyalar yayır.

Şər kampaniyasına qoşulan erməni mediası SEPAH-ın göstərişlərini icra edən iranlı politoloq Salar Seyfəddinin Təbrizi vuran PUA-ların Naxçıvan və Qarabağdan qalxdığı haqda səsləndirdiyi cəfəngiyyatı həvəslə tirajlayıb.

İranın Ermənistandakı səfiri Mehdi Sübhani bu barədə iddialara cavab verərək onda belə bir məlumat olmadığını bildirib.

Vüqar İskəndərov: Minsk qrupunun bərpası cəhdləri Qərbin siyasi riyakarlığının təzahürüdür

Vüqar İskəndərov

Milli Məclisin deputatı Vüqar İskəndərov “Yeni Müsavat”a açıqlamasında son günlər Azərbaycan Respublikasına qarşı məqsədli şəkildə informasiya təxribatları həyata keçirildiyini bildirib: “Lakin İranın müəyyən dairələri və onlarla koordinasiyalı şəkildə fəaliyyət göstərən media strukturları, eləcə də erməni informasiya resursları tərəfindən yayılan dezinformasiyalar növbəti dəfə ifşa olunub”.

O qeyd edib ki, Azərbaycanın İsrailə guya hərbi dəstək verdiyi, İrana qarşı həyata keçirilən hücumlarda ərazilərindən istifadə edildiyi barədə iddialar tam əsassızdır və ölkəmizə qarşı yönəlmiş növbəti qərəzli kampaniyanın bir hissəsidir: “İranın Ermənistandakı səfiri Mehdi Sübhaninin məlum cavabı bütün bu şayiələrin təkzib edilməsidir”.

Deputatın sözlərinə görə, Azərbaycan dövləti bölgədə yaşayan azərbaycanlı dinc əhalinin təhlükəsizliyi məsələsini daim diqqətdə saxlayır: “İsraillə İran arasında gərginliyin artdığı dövrdə, Azərbaycan rəhbərliyi müxtəlif kanallarla İsrail tərəfinə mesaj ünvanlayaraq, Güney Azərbaycanda yaşayan dinc əhalinin, xüsusilə mülki infrastrukturların hədəfə alınmaması üçün çağırış edib. Bu, ölkəmizin nə qədər qlobal təhlükəsizlik məsələlərinə həssas yanaşdığını və soydaşlarımızın taleyinə biganə qalmadığını göstərir”.

V.İskəndərov deyib ki, Azərbaycan ictimaiyyəti bu iddiaların mahiyyət etibarilə təxribat xarakteri daşıdığını aydın şəkildə görür və rədd edir.

Rəşad Bayramov: “Rusiyanın bu layihənin inkişaf etdirilməsi üçün ən böyük problemi maliyyə çatışmazlığıdır” - Azərbaycan Milli İstiqlal Partiyası

Rəşad Bayramov

Politoloq Rəşad Bayramovun sözlərinə görə, İran və İsrail arasında baş verən qarşıdurmadan ən çox təsirlənən ölkələrdən biri də bizik və bu da təbiidir: “İlk növbədə ona görə ki, bu ölkədə 40 milyona yaxın soydaşımız yaşayır və İrana qarşı uzunmüddətli və genişmiqyaslı müharibə Azərbaycana qaçqın axınına səbəb ola bilər. Bu isə öz-özlüyündə ölkəmiz üçün humanitar problemə yol aça bilər. Onların yerləşdirilməsi, ərzaq və digər zəruri avadanlıqlarla təmin edilməsi Azərbaycan üçün istər-istəməz çətinlik yaradar.

İkincisi, bu müharibə Azərbaycanın əsas silah tədarükçülərindən biri olan İsraili özünün silah tələbatının təmin edilməsinə fokuslaya bilər ki, bu da bizə lazım olan silah və texnikanın ötürülməsində çətinliklərə yol açar. İran ərazisində tranzit olaraq istifadə imkanlarımız da təhlükə altındadır. Bakıdan Naxçıvana və əks istiqamətdə avtobusların hərəkəti dayandırılıb. İran üzərindən təyyarə reyslərinin yerinə yetirilməsi də mümkünsüz olub. Həm bu marşrut üzrə, həm də Türkiyədən İran vasitəsilə Azərbaycana və buradan da digər istiqamətlərə daşınmalar da aktiv hərbi əməliyyatlar səbəbilə dayandırılıb. Bir sıra ölkələrə təyyarə reyslərinin dayandırılması turizm sektoruna da mənfi təsirlər göstərməyə başlayıb. Xüsusilə yay aylarında İran və İsraildən ölkəmizə turizm axınının olduğu məlumdur. Lakin indiki şərtlərlə bu da mümkünsüz olub. Buraya İrandan ölkəyə gətirilən ərzaq və digər məhsulların da idxalında ortaya çıxan problemləri əlavə etdikdə görürük ki, bu müharibə bizə olduqca mənfi təsir edir.

Odur ki, biz heç bir halda müharibədə tərəf olmaq niyyətində deyilik. Əksinə, tərəfdaş İsrail və qonşu İran arasında tez bir zamanda atəşkəsin əldə olunmasını istəyirik. Çünki bu müharibə bizə də ziyan vurur və müharibənin uzanacağı halda bundan əziyyət çəkən ölkələrdən biri də biz olacağıq. O baxımdan da bizi İsrailə dəstək verməkdə günahlandırmaq dezinformasiyadan başqa bir şey deyil. İranın davamlı şəkildə Ermənistana dəstək verməsinə, onlara silah-sursat ötürməsinə, Zəngəzur dəhlizinin açılmasına qaşı çıxmasına, İran rəsmilərinin ölkəmizlə bağlı təhdidilərinə və beynəlxaq platformalarda İsraildən fərqli olaraq Ermənistanın maraqlarını müdafiə etməsinə baxmayaraq, biz bu müharibənin tərəfi deyilik və ən rəsmi səviyyədə də bunu dəfələrlə bildirmişik. Azərbaycan öz ərazilərindən İrana zərbələr endirilməsinə və ya hansısa kəşfiyyat fəaliyyətinin həyata keçirilməsinə imkan verməyəcək. Ən azı ona görə ki, İranda, qeyd etdiyim kimi, milyonlarla soydaşımız yaşayır və biz onların bu və ya digər şəkildə zərər görməsini istəmirik".

Politoloqun sözlərinə görə, İsrail Azərbaycanın silah tədarükündə iştirak edən, Azərbaycanla enerji sahəsində uğurlu ticari əlaqələr qurmuş bir ölkədir. Başqa sözlə, bizim İsraillə olan tərəfdaşlıq münasibətlərimiz qarşılıqlı faydalı münasibətlərdir və hər hansı üçüncü ölkəyə qarşı yönəlməyib.

Bu gün Ermənistan mediasının cidd-cəhdlə Azərbaycanı İsrailə dəstək verməkdə günahlandırması İran-Azərbaycan münasibətlərini pozmaql niyyətindən başqa bir şey deyil. Eləcə də Rusiya və Türkiyədəki bəzi maraqlı qüvvələr bu cür dezinformasiya yaymaqla Azərbaycan-Türkiyə münasibətlərini hədəfə almaq cəhdləri edirlər.

Eyni şəkildə İranda da cənubdakı soydaşlarımızla aramızda təfriqə yaymağa cəhdlər edənlər var. Amma bu şəkildə aparılan anti-Azərbaycan təbliğatının uğur qazanma imkanları yoxdur. Həm Güneydəki soydaşlarımızın, həm də Türkiyədəki qardaş və bacılarımızın bu dezinformasiyalara qarşı diqqətli olması lazımdır. Azərbaycan təbii olaraq müxtəlif yollarla Cənubi Azərbaycan ərazilərindəki yaşayış məntəqələrinin zərər görməməsi, qeyri-hərbi infrastruktura və mülki əhaliyə zərər yetirməməklə bağlı İsrail tərəfə müvafiq mesajlar göndərir və bunu İrandakı soydaşlarımızın da bilməsi lazımdır".

Tarix: 19-06-2025, 15:30 Oxunub: 15