Qarabağın dirçəlişində strateji güc - Azərbaycan gəncliyi

Deputat: “Tikinti, mühəndislik, biznes işində əsas qüvvə yenə də gənclərdir”

“Qarabağın işğaldan azad olunmasından 4 ildən çox vaxt keçir. Bu müddət ərzində azad edilmiş ərazilərimizdə genişmiqyaslı bərpa və quruculuq işləri ardıcıl davam edir. Şəhər və kəndlərin yenidən dirçəldilməsi, yaşayış üçün uyğun infrastrukturun yaradılması istiqamətində dövlət tərəfindən ardıcıl və məqsədyönlü tədbirlər həyata keçirilir. Qarabağın bərpası, təbii ki, təkcə fiziki infrastrukturun qurulması ilə məhdudlaşmır. Bu proses uzun zaman, böyük enerji və ciddi maliyyə vəsaiti tələb edir”.

Bu fikirləri “Yeni Müsavat”a açıqlamasında Milli Məclisin deputatı Vüqar İskəndərov bildirib.

Deputatın sözlərinə görə, bu vəzifənin əsas və aparıcı hissəsini insan kapitalının, xüsusilə gənclərin fəal iştirakı təşkil edir: “Bu gün Qarabağ və Şərqi Zəngəzur bölgələrində müxtəlif sahələr üzrə minlərlə yeni iş yeri yaradılır ki, bu da bölgənin sosial-iqtisadi inkişafı üçün uzunmüddətli perspektivlər vəd edir. Gənclərin intellektual potensialı və Vətənə münasibəti dövlətin inkişafı baxımından strateji əhəmiyyət kəsb edir. Hər bir dövlətin tərəqqisi və ya zəifləməsində əsas rolu gənc nəsil oynayır. Əgər hansısa qüvvələr bir ölkədə xaos yaratmaq, milli genefondu zəiflətmək niyyətindədirsə, onların diqqət mərkəzində olan əsas yaş qrupu gənclərdir. Bu səbəbdən də sağlam milli şüura, vətənpərvər ruha sahib, təhsilli və bilikli gəncliyin formalaşdırılması dövlətlər üçün prioritet məsələyə çevrilir.

Azərbaycan bu sahədə mühüm və uğurlu yol keçmiş dövlətlərdən biridir. Ulu Öndər Heydər Əliyevin 1994-cü ildə hakimiyyətə gəlişindən sonra təsis etdiyi ilk qurumlardan biri Gənclər və İdman Nazirliyi olub. Bu addım onun gəncliyə verdiyi yüksək dəyərin, eləcə də dövlətin gələcəyini təmin edəcək əsas qüvvənin məhz gənclər olduğunu dərindən dərk etməsinin bariz nümunəsidir. O dövrdə formalaşan gənc nəslin bu gün müxtəlif sahələrdə-siyasətdə, iqtisadiyyatda, elmdə və ictimai həyatda mühüm rol oynaması birbaşa həmin strateji yanaşmanın nəticəsidir.

Xalqın inkişafı və özünü cəmiyyət daxilində realizə etməsində gənclərin milli kimlik şüuruna, mənəvi dəyərlərə hörmətinə, vətənpərvərlik ruhuna, eləcə də savad və bacarığa malik olmalarına xüsusi önəm verilir. Bu prinsiplərlə yetişən gənclərin Vətənə olan münasibəti də ona uyğun formalaşır. Prezident İlham Əliyev dəfələrlə vurğulayıb ki, onun hakimiyyətə gəldiyi vaxt hələ uşaqlıq çağında olan nəsil 2020-ci ildə artıq yetkin və əsl vətənpərvər Azərbaycan gənci kimi yetişmiş, Vətən müharibəsində misilsiz qəhrəmanlıq göstərərək üzərinə düşən tarixi missiyanı şərəflə yerinə yetirib. Azərbaycan gəncliyi Vətənə sevgi, fədakarlıq və qoruma hisslərini parlaq şəkildə nümayiş etdirdi. Azərbaycan gəncləri elə qəhrəmanlıqlar göstərdi ki, hər biri bir film ssenarisinə, kitaba və ya dastana çevrilə bilər".

Deputat eyni zamanda “Böyük Qayıdış” Proqramına da toxunaraq vurğulayıb ki, artıq azad olunmuş bir çox əraziyə mərhələli şəkildə köç həyata keçirilir. Deputat həmçinin vurğulayıb ki, işğaldan azad edilmiş torpaqlarda irimiqyaslı bərpa və yenidənqurma işləri sürətlə aparılır: “Bu ərazilərdə infrastruktur yenilənir, yaşayış məntəqələri bərpa olunur. Sevindirici haldır ki, Azərbaycan gəncliyi bu mühüm prosesdə də fəal iştirak edir. Müharibədən sonrakı dövrdə və hazırda həmin bölgələrdə aparılan tikinti, mühəndislik işlərində, eləcə də biznesin formalaşmasında əsas güc məhz gənclərin üzərinə düşür. ”Böyük Qayıdış" konsepsiyasında prioritet məsələlərdən biri də bölgələrdə məşğulluğun təmin olunması, yeni əmək bazarının formalaşdırılması və insanların doğma yurdlarında layiqli həyat sürməsi üçün şəraitin yaradılmasıdır. Bu baxımdan əsas məqsədlərdən biri yeni yaradılacaq iş yerlərində gənclərin dayanıqlı məşğulluğunu təmin etməkdir. Doğma torpağını canı qədər sevən gənclərimiz bu bərpa və quruculuq prosesində də öz sözlərini deməli, bacarıq və enerjilərini səfərbər etməlidirlər.

Hesab edirəm ki, yerli və savadlı gənclərdən maksimum faydalanmaq lazımdır. Gənclərin bölgələrə inteqrasiyası yalnız məşğulluq baxımından deyil, həm də urbanizasiya probleminin qarşısının alınması üçün mühüm vasitədir. Ucqar kəndlərdən böyük şəhərlərə axının qarşısını almağın effektiv yolu, məhz həmin bölgələrdə dayanıqlı iş yerlərinin yaradılmasıdır. Bu istiqamətdə isə sahibkarların, yerli iş adamlarının üzərinə ciddi məsuliyyət düşür. Onlar doğma kəndlərində və rayonlarında yeni iqtisadi imkanlar formalaşdıraraq, cəmiyyətə və dövlətə əhəmiyyətli töhfə verməlidirlər. Xüsusilə işğaldan azad olunmuş ərazilərə qayıdan gənclər həm doğma torpaqlarında işləyib uğur qazanmaları, həm də bölgələrin sosial-iqtisadi inkişafına dəstək vermələri baxımından nümunə olmalıdırlar.

Dövlət bu məqsədlə hər cür şərait yaratmağa çalışır. Lakin burada özəl sektorun, biznes strukturlarının və sahibkarların təşəbbüskar və məsuliyyətli yanaşması da vacib rol oynayır. Qarşılıqlı əməkdaşlıq və yeni iş yerlərinin yaradılması sayəsində məşğulluq səviyyəsinin artırılması Azərbaycanın gələcək inkişafında həlledici faktor olacaq".

Yazını hazırladı: Nigar HƏSƏNLİ

Tarix: 14-08-2025, 16:00 Oxunub: 18